Pangunahing Lathalain
Kalatas | Setyembre 2018
[I-download ang kopya ng Kalatas nitong Setyembre 2018 mula rito: K1809_colored ]
Nagkukumahog si Federico Campos, III, mga kasapakat nyang debeloper at lokal na opisyal ng reaksyunaryong gubyerno sa sapilitang pagpapalayas sa mga nakatira sa lupang Laiya—isang
desperadong hakbangin upang bigyang-daan ang pagtatayo ng anti-mamamayang proyektong Laiya Tourism Development Plan. Layunin nitong ibukas ang lalawigan ng Batangas sa ekoturismo at makaakit ng dayuhang mamumuhunan dito. Kabilang dito ang pagtatayo ng resort at iba pang proyektong pang ekoturismo ng Laiya Development Corporation, Aplaya Laiya Corporation at Macaria Development Corporation.
Apat na taon na ang nakalipas mula nang idemolis ang mga bahay ng mga residente sa Sitio Balacbacan, Brgy. Laiya Aplaya, San Juan, Batangas noong Hulyo 3, 2014. Umabot sa 600 pamilyang magsasaka at mangingisda ang naapektuhan nito laluna ang kanilang kabuhayan sa pangingisda. Kalakhan sa kanila na napilitang lumikas sa itinakdang relocation site sa Sitio
Hulo ay dumanas ng labis na kahirapan dahil sa kawalan ng oportunidad sa kabuhayan. Samantala, nanindigan pa rin ang ilan sa mga residente kayat nagtayo sila ng kanilang bahay sa kalsada at kampuhan sa munisipyo hanggang sa kasalukuyan.
Nito lamang Hulyo 23, kasabay ng SONA ni Duterte, ipinademolis muli ni Campos III ang mga bahay ng mga residente gamit ang aabot sa 450 demolition crew kabilang ang mga inupahan nyang mga gwardya ng JPS agency. Pinakamasahol pa, sinangkot nya rin sa nasabing demolisyon ang mga mag-aaral ng senior high school sa pamamagitan ng kanyang kasapakat na mga lokal na opisyal ng lalawigan. Nilinlang ang mga mag-aaral na diumano’y inupahan sila para sa clean-up drive para linisan ang tabing-dagat sa bahaging Lian Nasugbu-Tuy. Naglulunsad ng serye ng demolisyon ang kampo ni Campos III upang lubusang palayasin ang
mga magsasaka.
Sa kabuuan, aabot sa 100 ektarya ang kalupaang sinasaklaw ni Campos III sa Laiya Aplaya. Kabilang sa kanyang inaangking lupa ang Lot 62B kung saan ilang ulit na nyang pinadalhan ng notice to vacate sa pangunguna ni Victorino delos Angeles ng Laiya Development Corporation, maging ang Lot 62A na may mga lehitimong tenanteng nakatira. Sinasaklaw na rin
ng bantang pagpapalayas ang Lot 66B na inaangkin naman ni Sharon Castillo, kamag-anak ng pamilyang Llana na nangangamkam at nagmomonopolyo ng malaking bahagi ng lupa sa San Juan. Hindi pa nasapatan, tinatangka pa nilang bakuran ang lupang ito na sumasaklaw sa mga pananim ng mga magsasaka at ipinapa-aryendo para sa pribadong pagdebelop habang nililinlang ang mga magsasaka sa na Comprehensive Agrarian Reform Program (CARP). Kahit noong taong 2012 pa nawalan ng bisa ang conversion order at development permit sa lupang kinamkam ni Campos III, makailang ulit na nagtangka pa ring magdebelop sina Victorino delos Angeles at Felix Panganiban, mga kasapakat na debeloper ni Campos III, sa pamamagitan ng palihim na pagpapapasok ng materyales at konstruksyon ng kubo tuwing gabi.
Paulit-ulit na nakararanas ng pananakot at pandarahas ang mga residente sa pamamagitan
ng pasistang AFP-PNP at bayarang goons ng mga panginoong mangangamkam ng lupa upang supilin ang nakikibakang mamamayan. Noong Mayo 2015, idineploy sa komunidad ang 730th Combat Group Philippine Airforce na pangunahing lumalabag sa kanilang karapatang-tao sa kumpas ni Campos III bukod pa sa yunit ng CAFGU ng 59th IBPA. Nito lamang Hunyo 3, dinala ang 1st IBPA sa lugar. Nagtayo sila ng kampo militar sa mismong lupang sakahan ng mga magsasaka sa kabila ng pagtutol ng mga residente. Dagdag pa rito, ang Macaria Development Corporation at Laiya Development Corporation na pagmamay-ari ni Campos III at delos Angeles ay may bayarang armadong pwersa at goons upang wasakin ang barikada ng mamamayang lumalaban sa kanilang pakanang iligal na pagpapaunlad sa lugar.
Gamit ang mga armadong pwersang ito, kinontrol nila ang galaw ng mga residente tulad ng pagbabawal sa pagmo-motor, pagsita sa mga dumadaan malapit sa kanilang kampo at pagpigil sa pagbabakod sa pananim ng mga magsasaka. Hanggang sa kasalukuyan, patuloy na nakararanas ang mga residente ng pagbabanta, panghaharas, intimidasyon, militarisasyon sa kanilang lugar at pagsasampa ng gawa-gawang kaso laluna sa mga lider masa at aktibistang myembro ng Haligi ng Batangueñong Anakdagat (HABAGAT). Matatag itong hinarap ng mamamayan ng Laiya Aplaya sa suporta ng malawak na mamamayan mula sa iba’t ibang uri at sektor hindi lamang sa Batangas kundi sa buong rehiyon.
Pinagpupugayan ng rebolusyonaryong kilusan at mamamayan ng Timog Katagalugan ang magiting at matapang na pagharap ng masang magsasaka at mangingisda ng Laiya Aplaya sa kaliwa’t kanang pag-atake ng kampo ni Campos III. Sa loob ng apat na taon, nanindigan sila para sa kanilang lupang sakahan at panirikan, at hanggang ngayon, hindi pa rin sila napalalayas sa lugar. Patunay itong hindi kayang buwagin ang mahigpit na pagkakaisa ng mamamayang Batangueño at kailanman, hindi matutumbasan ni Campos III ng anumang halaga ng pera ang kanilang pakikibaka para sa kanilang karapatan sa lupa. Ang pakikibaka ng masang magsasaka at mangingisda ng Laiya Aplaya ay hindi hiwalay sa pakikibaka ng kilusang magsasaka at mangingisda sa buong rehiyon at bansa. Hanggat hindi pa nakukuha ng mga naghaharing-uri ang kanilang kagustuhan, magpapatuloy ang kanilang pandarahas sa residente ng Laiya Aplaya. Kung kaya, kailangang patuloy na padagundungin ang laksalaksang bilang ng mamamayan sa lansangan upang ipanawagan ang kanilang karapatan sa lupa, panirikan, kabuhayan at hustisya. Dapat na ilantad ang mga pandarahas na ginagawa ng mga armadong pwersa ni Campos III at pagbayarin sa lahat ng kanilang krimen sa
mamamayan. Higit sa lahat, kailangang pahigpitin ng mamamayan ng Laiya Aplaya ang kanilang pagkakaisa laban sa lahat ng pakana ni Campos III upang mapalaya ang kanilang sarili mula sa tiranyang inihahasik ng mga panginoong maylupa at mangangamkam ng lupa.
Batid ng mamamayan ng Laiya Aplaya na wala itong ibang masusulingan kundi ang kanyang sariling lakas kasama ang iba pang mamamayang inaapi’t pinagsasamantalahan sa buong rehiyon at sa bansa. Patuloy nilang patatagin ang kanilang hanay upang salagin at labanan ang anumang pag-atake ng mga armadong pwersa ni Campos III at iba pang lokal na
naghaharing uri hanggang sa ganap na mabigo ang lahat ng kanilang anti-mamamayang pakana.
=======
Ang KALATAS ang opisyal na pahayagan ng rebolusyonaryong mamamayan ng Timog Katagalugan. Pinapatnubayan ito ng MarxismoLeninismo-Maoismo. Inilalathala ito ng Partido Komunista ng Pilipinas (MLM) at ng Bagong Hukbong Bayan ng Timog Katagalugan.
Inaanyayahan ng patnugutan ang mga mambabasa na mag-ambag sa pagpapahusay ng ating pahayagan. Magpadala ng mga komentaryo at mungkahi, balita at rebolusyonaryong
karanasan na maaaring ilathala sa ating pahayagan.
Ito ay tumatanggap ng mga liham sa:
st.kalatas@gmail.com
balikwastk.wordpress.com
Balikwas 