Hinggil sa mabagal at inutil na pagtugon ng gubyerno sa kalamidad dulot ng pagputok ng bulkang Taal

Pahayag | Patnubay de Guia
Tagapagsalita, NDFP ST
January 17, 2020

Mariing kinokondena ng National Democratic Front of the Philippines-Southern Tagalog (NDFP-ST) ang kainutilan at pagiging bangkarote ng gubyernong Duterte sa makupad pa sa pagong na paghahatid ng serbisyo sa puo-puong libong sinalanta at biktima ng pagputok ng bulkang Taal. Tinatayang aabot na sa 40,752 katao ang nadisloka sa pagsabog ng bulkang Taal at 38,203 ang nasa 198 na mga evacuation center sa Batangas at Cavite. Napipintong madisloka pa ang may 300,000 mamamayan kapag nangyari ang pinangangambahang kasunod na mas malakas na pagsabog.

Unang araw pa lamang ng pagsisimula ng pag-aalburoto hanggang sa aktwal na pagputok ng bulkang Taal, pangita na agad ang kapabayaan at kawalang kahandaan ng gubyerno sa pagtugon sa kalamidad. Hindi agad naiparating ng National Disaster Risk Reduction and Management Council (NDRRMC) sa lokal na katapat nito sa probinsya ng Batangas ang kautusan sa mga lokal na gubyerno na agaran nang palikasin ang mga tao na naninirahan sa isla ng bulkang Taal at mga nasa paligid ng Lawa ng Taal matapos itaas ng Philippine Institute of Volcanology and Seismology (Philvocs) ang alert level 4 mula sa dating alert level 2.

Sa kawalan ng maagap na abiso mula sa gubyerno maraming tao ang nalagay sa panganib habang ang iba ay nagkusa nang nagsilikas at nagkanya-kanya nang hanap ng mga lugar para sa kanilang kaligtasan. Ang ilang residente mula sa mga bayan ng Laurel at Agoncillo ay binagtas ang matarik at mapanganib na daan papuntang Alfonso, Cavite para iligtas ang sarili dahil sa kawalan ng dumarating na tulong mula sa gubyerno para sila ay agarang mailikas.

Ipinapakita ng mga pangyayari kung gaano kakupad, kainutil at dis-organisado ang pagtugon ng rehimeng Duterte at mga ahensya nito sa mga pangangailangan ng mga mamamayang nagbakwit.

Wala talaga sa interes ng gubyernong Duterte ang pagbibigay ng prayoridad at mabigat na pansin upang paghandaan ang darating na mga kalamidad sa bansa. Katunayan, imbis na dagdagan ang kakapiranggot na 20 bilyong piso na calamity fund noong 2019 binawasan pa ito ng 4 bilyong piso ngayong 2020 habang pinalaki tungong 9.3 bilyon ang confidential and intelligence funds ng Office of the President, Department of National Defence, DILG at iba pang ahensya ng reaksyunaryong gubyerno na gagamitin lamang sa pagsupil sa mamamayan.

Ang mga intelligence and confidential fund ay hindi sumasailalim sa pagsusuri ng Commission on Audit (COA) kaya malayang nagagawa ng mga tiwaling opisyal ng gubyerno tulad ni Duterte na waldasin at kurakutin ang pondo ng bayan. Bukod pa dito ang mga isiningit sa badyet na bilyon-bilyong pork barrel ng mga gahamang Kongresista at Senador.

Katulad ito sa patuloy na pagliit ng pondo na inilalaan ng gubyerno sa mga serbisyong panlipunan. Ang maliit na ngang nakalaan para sa calamity fund ng mga lokal na gubyerno ay lalo pang nababawasan nang malaki dahil sa talamak na korupsyon ng matataas na opisyal ng gubyerno. Samantala, patuloy namang naglalakihan ang mga pondo ng AFP at PNP lalo na ang kanilang intelligence fund at budget sa madugong gyera sa iligal na droga at kontra insurehensya. Halos doble din ang inilaki ng pondong nakalaan sa intelligence and confidential fund ng Office of the President na umabot sa 4.5 bilyong piso mula sa dating 2.5 bilyong piso noong 2019.

Walang kahihiyan pang nanawagan si Año sa mga pribadong donasyon para sa mga bakwit ng pagsabog ng bulkang Taal habang iniipit at ibinubulsa ng DILG at mga tiwaling opisyal ng reaksyunaryong gubyerno ang bilyon-bilyong calamity fund.

Kung tutuusin mula sa mga pribadong entidad ang dumadagsang donasyon at tulong. Aktibo ding ibinubukas ng simbahan at mga pribadong mapagkawang-gawa ang kanilang rekurso at pasilidad para sa mga bakwit. Mula sa mga organisasyon ng mamamayan at mga estudyante nagmumula ang maraming mga boluntaryo sa mga relief operation na inoorganisa ng mga progresibo.

Sa harap ng malaking sakunang ito, nakuha pa ng mga ahensya ng reaksyunaryong gubyerno na gamitin ang kalamidad para makakuha ng publisidad at magpabango sa tao. Ipinapakita lamang ito ang pagiging manhid, hiwalay sa reyalidad at kawalan ng malasakit ng pasistang rehimeng US-Duterte sa kinasasadlakang kalagayan ng mga mamamayang nasalanta at naapektuhan ng pagsabog ng bulkang Taal.

Wala sa lugar at manhid ang pahayag ni Secretary William Dar ng Department of Agriculture (DA) na handa nilang pautangin ng halagang 25 libong piso, na walang interes at babayaran sa loob ng 3 taon, ang mga magsasaka at mangingisdang napinsala ng pagsabog ng bulkang Taal. Malaking insulto ito para sa mga magsasaka at mangingisda na nadisloka ng pagsabog ng bulkang Taal. Kagyat na tulong at hindi pautang ang kailangan nila sa kasalukuyan. Kailangan din nila ang malinaw, komprehensibo at pangmatagalang plano mula sa gubyerno kung paano sila matutulungan para ibangon ang nawasak nilang tahanan at kabuhayan. Sa inihahaing pautang ng DA, hindi pa man nakakabangon ang mga magsasaka at mangingisda sa pinsala ng pagputok ng bulkang Taal, gusto pa silang ibaon ng DA sa panibagong pagkakautang.
Isa pa itong garapal at pasistang Secretary Eduardo Año ng DILG na walang kahihiyang ipinababalikat sa mga pribadong entidad ang paghahatid ng tulong sa mga nasalanta ng pagputok ng bulkang Taal habang ang kanyang ahensya, na limpak limpak ang hawak na intelligence fund, ay ni wala o kakarampot ang halagang inilaan sa pagtulong sa mga nasalanta ng pagputok ng bulkang Taal. Mas gugustuhin pa ng pasistang si Secretary Año na gamitin ang pondo ng DILG sa pagsupil at pagpaslang sa mga mamamayan na itinuturing nilang “kaaway ng estado” kaysa paglaanan ng pondo ang mga biktima ng kalamidad.

Samantala, nanatiling buhay ang diwa ng damayan at pagmamalasakit sa hanay ng ating mga kababayan. Mabilis na dumaloy at bumaha ang mga tulong na nanggaling sa mga pribadong indibidwal, simbahan, institusyon, mga progresibong grupo at samahan, mula sa iba’t ibang panig ng bansa, na di hamak na mas mabilis makarating sa tao kumpara sa tulong na nanggagaling sa reaksyunaryong gubyerno.

Kahanga-hanga din ang mabilis na pagtugon ng ating mga kababayan sa pangangailangan ng mga bakwit. Sila ang unang nakatugon at nakasagip sa mga kababayan nating nalagay sa panganib ang buhay dahil sa pagputok ng bulkang Taal. Mabilis ilang nangalap ng mga donasyon at tulong para agarang ipantawid-gutom ng mga nasalanta. Ibinukas nila ang kanilang mga tahanan para kupkupin ang mga nagsilikas bilang alternatibo sa kakulangan ng mga lugar para gawing evacaution center ng mga lokal na gubyerno.

Kabaligtaran ito sa mga ginawa at naging performance ng mga ahensya ng gubyernong Duterte. Ang tanging ipinamamalaki ng NDRRMC na ayuda ay ang ga-mumong humigit-kumulang sa dalawang (2) milyong panagip na tulong. Samantala, si Duterte ay 2 milyong face mask lamang ang naipadalang tulong sa mga sinalanta ng pagputok ng bulkan.

Lalo lamang nahubad sa publiko ang pagiging inutil, pabaya at walang malasakit ng pasistang rehimeng US-Duterte sa pangangailangan at kapakanan ng taumbayan. Ang pagbisita niya sa evacuation center sa Bauan, Batangas ay bahagi ng kanyang media publicity—pagpapakitang-tao at pagkukunwaring nakikiramay sa sinapit ng mga kababayan nating Batangueño. Hindi na nito kaya pang tabunan o pagtakpan ang kanyang mga kapabayaan, kawalan ng kahandaan at pagiging inutil sa pagtugon sa mga kalamidad na dumarating sa bansa. Ang gubyernong Duterte mismo ang pinakamalaking kalamidad na tumama sa mamamayan.

Ang NDFP-ST ay laging kaisa at maaasahan ng taumbayan sa paghahatid ng tulong sa mga kababayan nating sinalanta ng pagputok ng bulkang Taal tulad sa naging tulong nito sa mga biktima ng mga bagyo at lindol sa nakaraan. Mahigpit ding kaisa at laging kasama ng taumbayan ang rebolusyonaryong kilusan sa patuloy na paglaban sa mga anti-mamamayang patakaran at programa ng korap, traydor, pabaya, kriminal at pusakal na mamamatay tao na pasistang rehimeng US-Duterte. ###

Bukas na liham sa mga mamamayan sa Batangas na nasalanta ng pagputok ng bulkang Taal

Patnubay de Guia
Tagapagsalita, NDF-ST
Enero 14, 2020

Para sa mahal naming mga kababayan sa Batangas at mga karatig probinsya nito:

Ang National Democratic Front of the Philippines-Southern Tagalog (NDFP-ST) at mga kaalyadong organisasyon nito sa rehiyon ay karamay at kaisa ng mga kababayan nating nasalanta at naapektuhan ng pagputok ng bulkang Taal. Tagos sa aming puso’t isipan ang hirap at sakit na inyong nadarama sa kasalukuyan at maging ang labis ninyong pag-aalala sa inyong mga naiwang ari-arian, mga alagang hayop, pananim at iba pang kabuhayan. Sa pamamagitan ng mga kaalyadong organisasyon at mga kaibigan ng NDFP-ST, gumawa ito ng mga paraan paano makakatulong mula sa aktwal na paglilikas, pangangalap ng mga pagkain, tubig, gamot, materyal at iba pang pangangailangan ng mga nagsilikas nating mga kababayan. Ang mga naorganisang boluntir ng NDFP-ST ay naruon na sa lugar at sa kasalukuyang naghahatid ng tulong sa mga nasalanta nating kababayan.

Umaapela na rin ang NDFP-ST sa lahat ng ating mga kababayan na magkaloob ng anumang tulong para sa mga nasalanta at naapektuhan ng pagputok ng bulkang Taal. Higit sa anupaman ay sumalig tayo sa sariling lakas, pagsasama-sama at pagdadamayan upang harapin at makabangon mula sa trahedyang dulot ng natural na kalamidad.

Patuloy pang nakataas ang babala ng Philippine Institute of Volcanology and Seismology (Philvocs) na sa anumang oras o mga araw maaaring mapanganib na pumutok ang bulkang Taal at magdulot pa ito ng tinatawag ng Philvocs na volcanic tsunami. Pinapayuhan namin ang lahat ng ating mga kababayan na agaran nang magsilikas lalo na ang mga naninirahan sa tinaguriang mapanganib na mga lugar (danger zones). Ang iba pang mga boluntir ng NDFP-ST ay nagsitungo na rin sa lugar upang tumulong at maisagawa ang organisadong paglilikas sa ating mga kababayan na naiipit pa sa mga mapanganib na lugar dahil sa mabagal na pagdating ng tulong mula sa gubyernong Duterte at kakapusan naman ng mga lokal na gubyerno.

Sa harap ng kainutilan ng gubyernong Duterte na mabilis na ihatid ang tulong sa mga nasalanta ng pagputok ng bulkang Taal, nauna pang magpadala ang lokal na pamahalaan ng Pampanga ng 50 sasakyang convoy ng mga medical volunteers at rescue teams, mga gamot, 8,000 food packs at iba pang pangangailangan ng mga biktima habang si Gobernador Suarez ng Quezon ay isang 7-kataong rescue team lamang ang ipinagmamalaking naipadala nya.

Ang pagputok ng bulkang Taal ay may pangmatagalang epekto sa pananim at iba pang kabuhayan ng mga magsasaka, manggagawang bukid, mangingisda at iba pa lalo na yaong umaasa ang kabuhayan sa lawa ng Taal gayundin sa komersyo at iba pang pang-ekonomiyang aktibidad sa probinsya. Ang abo at buhangin na ibinuga ng pagputok ng bulkang Taal ay sisira sa kabahayan, sa libong ektarya ng pananim ng mga magsasaka hindi lamang sa mga bayang nakapalibot sa lawa ng Taal kundi maging sa kalapit na bayan sa loob ng probinsya ng Batangas, mga bayan sa hangganan ng Cavite, Laguna, Quezon at sa islang probinsya ng Mindoro. Napakalaki na din ang dinulot na pinsala sa mga fishpens/fish cages na nasa sa lawa ng Taal kung saan libong mangingisda ang apektado ang kabuhayan. May ulat na apektado din ang kita ng mga mangingisda sa mga baybaying dagat sa kanlurang Batangas hanggang sa dulong norte ng dalawang probinsya ng Mindoro dulot ng buga ng abo at buhangin ng pagputok ng bulkang Taal.

Sa ganitong kalagayan, hindi lamang nakatuon ang pansin ng NDFP-ST sa kagyat na pagtulong sa paglilikas at pagsasagawa ng mga relief operations sa mga nasalanta ng kalamidad dulot ng pagputok ng bulkang Taal. Nakatuon na rin ang atensyon ng NDFP-ST sa kasunod na yugto—ang rehabilitasyon. Sa katunayan, may mga inisyal na plano nang nabuo ang pamunuan ng NDFP-ST at mga magkakaalyadong organisasyon sa ilalim nito kung paano makakatulong sa gagawing pangmatagalang rehabilitasyon at pagbabangon muli ng kabuhayan ng mga nasalanta sa pagputok ng bulkang Taal.

Titiyakin ng rebolusyonaryong kilusan, sa abot ng kanyang makakaya, na maihatid sa taumbayang nasalanta at naapektuhan ng pagputok ng bulkang Taal ang mga kinakailangang tulong para sa rehabilitasyon ng kanilang mga nasirang kabahayan at kabuhayan. Batid namin na napakabigat na pasanin ang usapin ng rehabilitasyon. Bilyong halaga ang kailangan. Pero naniniwala kami na kapag malakas at masigla ang pagtutulungan at damayan nating lahat, kabilang ng iba pa nating mga kababayan sa Luzon, Visayas, Mindanao at mga nasa ibayong dagat, kakayanin nating makaalpas at makabangon muli sa pinsalang dulot ng pagputok ng bulkang Taal.

Subalit kailangan nating kumilos at makibaka upang ipanawagan at igiit sa gubyernong Duterte na laanan ng malaking pondo ang pagtulong at rehabilitasyon sa mga nasalanta at naapektuhan ng pagputok ng bulkang Taal. Ipanawagan na ibaling ang pondong nakalaan sa militar at kapulisan tungong pondo sa relief at rehabilitation programs nito. Nasasayang lang ang pondo ng bayan na nakalaan sa AFP at PNP sa bigong gyera kontra iligal na droga nito at sa pondong ginagamit sa mga operasyong militar ng mga ito na ang tanging napipinsala ay mga inosenteng sibilyan at kabuhayan ng mamamayan.

Kailangan ding itaas ang pagmamatyag ng mamamayan sa mga tiwaling pulitiko at upisyal ng reaksyunaryong gubyerno na sasamantalahin ang kalamidad na ito upang magkaroon ng opurtunidad na ibulsa ang milyun-milyong calamity fund na para sa mamamayan.

Kailangang magkaisa, kumilos at makibaka ang taumbayan para ipanawagan ang matagalang moratorium sa pagbabayad ng mga magsasaka sa upa sa lupa sa mga panginoong maylupa, sa taunang pagbayad sa certificate of land ownership award (CLOA) sa ilalim ng bogus na repormang agraryo ng pasistang rehimeng US-Duterte at sa pagbayad ng kanilang pagkakautang at paniningil mula sa mga institusyong pinansyal at financial cooperatives. Lalong kailangang ngayon ng kilusang masa na isulong at i-pursige ang mga pakikibaka para sa pagkakaroon ng trabaho, disenteng hanapbuhay, nakabubuhay na sahod, libre at murang pabahay, pagpapababa ng presyo ng mga pangunahing bilihin at mura at abot kamay na serbisyong pampubliko.

Mahalaga ding ipanawagan sa gubyerno ang moratorium sa pagbabayad ng dayuhang utang at pagsasantabi sa mga kwestyunableng utang na pinasok ng mga nakaraang rehimen at ng rehimeng Duterte sa bansang China at sa iba pang mga imperyalistang bansa lalo na sa Estados Unidos. Ang ibabayad sa utang ay dapat ilaan bilang pondo sa rehabilitasyon at tulong pangkabuhayan sa mga nasalanta at naapektuhan ng pagputok ng bulkang Taal.

Higit sa lahat, dapat kumilos at makibaka ang taumbayan para igiit sa pasistang rehimeng US-Duterte na itigil na ang pagpapatupad ng mga anti-mamamayang patakaran at polisiya na lalong nagpapahirap sa taumbayan dahil sa masugid na pagsunod nito sa mga imperyalistang imposisyon sa bansa ng US sa anyo ng neoliberalistang programa na pribatisasyon, deregularisasyon, liberalisasyon at denasyunalisasyon. ###

Hinggil sa pagputok ng Bulkang Taal

Pahayag | Patnubay de Guia
Tagapagsalita, NDF-ST
January 13, 2020

Ang National Democratic Front of the Philippines-Southern Tagalog (NDFP-ST) ay nananawagan sa lahat ng mga kasaping organisasyon nito at mga kaibigan at kaalyado sa rehiyon na magsagawa ng mga relief operation at tumulong sa paglilikas ng iba pa nating mga kababayan na nasa baybaying bayan na nakapalibot sa Taal Lake na kinaroonan ng nag-aalburotong Taal Volcano. Itinaas na ng Philippine Institute of Volcanology and Seismology (Philvocs) ang babala sa level 4 at nagsabi na anumang oras o araw ay magkaroon ng mapanganib na pagsabog ang bulkang Taal at kapag nasa alert level 5, ayon sa Philvocs, ay maaaring magdulot din ng volcanic tsunami ang pagputok ng bulkang Taal. Dahil sa ganitong sitwasyon, kailangan nating makapagmobilisa, sa mabilis na paraan na kakayanin, ng mga boluntir para agarang magsagawa ng mga paglilikas sa ating mga kakababayan sa probinsya ng Batangas at kaalinsabay magpatupad ng mga relief operations sa mga pagdadalhang evacuation areas.

Inaatasan din ang lahat ng mga kasaping organisasyon na magbuo ng mga task forces na siyang magsisilbing coordinating body para pamunuan ang paglilikas at pagsasagawa ng mga relief operations. Ang iba naman ay dapat sumentro sa pangangalap ng mga damit, pagkain, gamot, tubig at ibang materyal na gagamitin sa mga evacuation areas.

May mga nauna na tayong plano at mga standard operating procedures (SOP) na otomatikong pinatutupad sa panahon ng mga kalamidad. Kailangan na lang itong balikan at rebyuhin ng bawat kasaping organisasyon ng NDFP-ST upang maisakatuparan ang mabilis, puspusan at episyenteng relief operations at iba pang humanitarian missions.

Maaaring sa darating pang mga araw ay lalong titindi pa ang pag-aalboruto ng bulkang Taal kaya ang ating mga pagsisikap sa pagtulong at pag-alalay sa ating mga kababayan ay magpapatuloy habang patuloy ding gumagampan ng ating mga rebolusyonaryong gawain. Dapat laging ipauna ang kapakanan at kagalingan ng taumbayan lalo na ang mga kababayan natin sa Batangas na ngayon ay nahaharap sa matinding panganib dulot sa posibilidad na anumang oras o araw, ayon sa Philvocs, ay maaaring mangyari ang isang malakas at mapaminsalang pagputok ng bulkang Taal. Bigyan natin ng nararapat na tugon at atensyon ang kanilang pangangailangan sa kagyat.

Ngayon pa lamang ay malawak na ang naging pinsala sa pananim at kabuhayan ng ating mga kababayang magsasaka at mangingisda sa mga bayan na nakapalibot sa Taal Lake, sa iba pang bayan ng Batangas at maging sa mga karatig probinsya ng Batangas dahil sa makapal na abo at buhangin na ibinuga mula sa pagputok ng bulkang Taal. Matindi ang gagawing rehabilitasyon sa mga lupaing agrikultural at lawa ng Taal na nabalot ng makakapal na abo at buhangin na binuga ng pagputok ng bulkang Taal. Dapat nating paghandaan at matamang pagplanuhan, sa mga susunod na mga araw, kung ano ang ating mga susunod na hakbang para makatulong sa rehabilitasyon ng mga nasirang kabuhayan ng ating mga kababayan sa Batangas.

Pinapaalalahanan din ang lahat na laging maging alerto at mapagmatyag sa patraydor na mga pag-atake ng reaksyunaryong tropa ng AFP at PNP, na walang pinipiling panahon kung umatake, kahit panahon ng mga kalamidad. Ugali na ng AFP at PNP na militarisasahin at birahin ang anumang mga humanitarian missions na isinasagawa ng rebolusyonaryong kilusan at maging ng mga progresibong organisasyon at grupo, ng mga grupong sibiko at taong simbahan dahil sa hindi nila kinikilala ang Comprehensive Agreement on the Respect of Human Rights and International Humanitarian Law (CARHRIHL) na pinirmahan ng GRP at NDFP nuong 1998 kabilang ang iba pang makataong batas sa ilalim ng international humanitarian law ng United Nations.###

Hinggil sa mga pinakahuling kasinungalingan ng SolCom

Pahayag | Patnubay de Guia
Tagapagsalita, NDF ST
January 8, 2020

Mariing kinokondena ng National Democratic Front of the Philippines-Southern Tagalog (NDFP-ST) ang malisyosong paratang ni Lt. Colonel Dennis Cana, public information officer ng Southern Luzon Command (SOLCOM) ng AFP, na ginamit lang ng CPP-NPA-NDFP ang nakaraang tigil putukan para makapangikil sa mga government projects, private contractors at business establishments at ganundin para makapagpalakas.

Sa likod ng mga akusasyong ito, mas dapat ipaliwanag ni Cana ang pag-iral ng sari-saring sindikatong kriminal sa loob ng AFP at PNP. Dapat ipaliwanag ni Cana kung papaano ibinubulsa at pinagkakwartahan ng mga opisyal na tulad nya ang milyun-milyong pondo ng E-CLIP at gunrunning syndicate sa loob ng Logistic Command ng AFP.

Sa isang banda, hindi maipagkakaila ni Cana na ang pinakamataas na upisyal ng PNP na si Albayalde ay siya mismong protektor ng mga ninja cops sa pagresiklo ng iligal na droga. Ang buong institusyon mismo ng AFP at PNP ang pinakamalaking sindikato sa bansa na pinamumugaran ng sari-saring kriminal sa mga operasyong kidnap-for-ransom, gun-for-hire, protection racket, drug trade, human trafficking, jueteng at lahat ng uri ng kriminalidad.
Bawat matataas na opisyal ng AFP at PNP ay tumatanggap ng daan-daang libong buwanang payola o suhol mula sa mga jueteng lord bilang proteksyon sa kanilang iligal na impormasyon. Kaya Lt. Col. Cana, sino ngayong ang mangingikil?

Gaano man ang gawing pagandahin ang imahen ng AFP at PNP, hindi mabubura ang mersenaryo at marahas na katangian nito sa pagdahas at pagsupil sa mamamayan.
Kung tatanungin ang mamamayan kung sino ang tunay na salarin, mangingikil at magnanakaw, walang pag-aatubiling ituturo nila ang mga elemento ng AFP at PNP. Mga tropa ng AFP ang nagnanakaw ng kanilang mga alagang manok at baboy tuwing nag-ooperasyon ito. Mga tropa ng AFP ang sumusunog at sumisira sa kanilang pananim. Mga tropa ng AFP ang nananakit, nagpapahirap, nanggagahasa at pumapatay sa walang kalaban-labang mga sibilyan.
Isinusuka ng maliliit na negosyante at mga byahero ang mga checkpoint ng AFP at PNP na talamak sa pangongotong at pangingikil. Kaya naman, laking tuwa at ipinagbubunyi nila tuwing pinatatamaan ng mga aksyong militar ng NPA ang mga tropa ng AFP at PNP.

Nais iligaw ni Cana ang tunay na isyu sa usapang pangkapayapaan at tigil-putukan. Binabaluktot ni Cana ang usapin na nakikinabang lamang dito ang CPP-NPA at NDFP. Subalit nakikinabang din dito ang AFP-PNP at gubyernong Duterte dahil sa panahong nakatayo ang tigil-putukan, isinuspindi at ipinagpaliban ng NPA ang mga aksyong militar laban sa AFP-PNP at mga paramilitar na nasa ilalim ng AFP para likhain ang paborableng klima para muling buksan ang usapang pangkapayapaan. Disin sana’y maraming ulit nang pinatamaan ng mga taktikal na opensiba ng NPA ang mga tropa nilang nagsasagawa ng focused military operation.

Lupa at langit ang pagkakaiba ng NPA sa AFP-PNP. Kaya naman labis na minamahal at tinatangkilik ng mamamayan ang NPA na tanging hukbong tagapagtanggol nila laban sa lahat ng mapang-api at mapagsamantalang uri kabilang ang mersenaryong instrumento ng estado ng naghaharing uri. Kung gaano minamahal ng masa ang NPA ay ganun din nila kinamumuhian ang mersenaryo at pasistang AFP at PNP.

Hindi na kailangan pang isa-isahin ang dahilan. Batid ng masa mula mismo sa kanilang karanasan kung sino ang tunay na hukbo nila. Papayagan ba ng masa na ibigay ang pinakamahuhusay nilang anak para maglingkod sa NPA kahit walang sweldo kung hindi nila itinuturing itong kanilang hukbo?

Sa AFP at PNP, sino ang mangangahas maglingkod nang tapat sa interes ng bayan at masa kung hindi tatanggap ng sweldo at kabayaran? Pera at pabuya ang motibasyon ng bawat elemento ng AFP at PNP kaya sila nananatili sa serbisyo. Pabalat bunga na lamang ang sinasabi nilang maglingkod at magtanggol sa mamamayan. Ang totoo, institusyon sila sa pagtatanggol sa interes ng mga mapagsamantala at mapang-api at sa pagsupil sa demokratikong karapatan at interes ng mamamayan.

Kaya Lt. Col. Cana, bago ka magbitaw ng paninira sa rebolusyonaryong kilusan, tingnan mo muna ang tunay na imahen ng kinabibilangan mong institusyon at ang ipinagtatanggol na interes ng mersenaryong tradisyon nito. ###

Ibasura ang Tax Reform for Acceleration and Inclusion (TRAIN) Law, Oil Deregulation Law at lahat ng mga anti-mamamayang patakaran at programa na ipinatutupad ng pasistang rehimeng US-Duterte

Pahayag | Patnubay de Guia
Tagapagsalita, NDF ST
Enero 6, 2020

Ang National Democratic Front of the Philippines-Southern Tagalog (NDFP-ST) ay nakikiisa at sumusuporta sa panawagan ng taumbayan sa pagbasura sa Oil Deregulation Law, Train Law at lahat ng anti-mamamayang patakaran at programa ng pasistang rehimeng US-Duterte na nagdudulot ng labis na kahirapan sa sambayanang Pilipino. Ito ang napapanahon na solusyon na kailangang agarang ipatupad ng rehimen sa gitna ng lumalaking banta ng pagsirit ng presyo ng langis sa pandaigdigang pamilihan dahil sa lumalang tensyon at sigalot sa Gitnang Silangan. Ang anumang pagsirit ng presyo ng langis sa pandigdigang pamilihan ay mas matindi ang tama at epekto sa mga bansang tulad natin na pangunahing umaasa sa importasyon ng langis para sa konsumo at pangangailangan ng industriya ng bansa.
Lalong pinag-alab ang dati nang sigalot at tensyon sa pagitan ng bansang Iran at USA nang ipag-utos ni Pangulong Donald Trump ng USA ang pagpatay kay Major General Qasem Soleimani, commander ng Iranian Revolutionary Guards’ Quds Force at iba pang kasamahan nitong matataas na opisyal militar ng Iran at kaalyadong Iraqi militias na Hashed al-Shaabi, habang patungo sa Baghdad International Airport noong Enero 3, 2020. Ito’y malinaw na isang lantarang agresyon sa soberenya ng bansang Iraq kung saan ginawa ang pagpatay ng USA sa grupo nina General Soleimani mula sa Iran at sa mga Iraqis na kabilang sa Hashed al-Shaabi militias. Umani ng mga pagbatikos ang aksyon ni Trump at US sa pagpatay kay General Soleimani, pinakamataas na heneral ng Iran, hindi lamang mula sa ibang bansa kundi maging sa loob ng USA lalo na mula sa karibal niya sa pulitika na mga Democrats na dominado ang mababang sangay ng Kongreso. Maging ang bansang Saudi Arabia na kilalang mayaman sa suplay ng langis sa buong daigdig at pangunahing kaalyado ng bansang USA ay hindi nagustuhan ang ginawa ng USA.

Tiyak na mauuwi sa lalong pagtindi ng tensyon at armadong komprontasyon sa pagitan ng USA at Iran ang ginawang pagpatay kay Soleimani na ipinag-utos ni Trump. Gumawa ng pagbabanta ang Iran na gaganti sa ginawang pag-atake ng USA. Magbibigay daan ito sa pagtindi ng krisis sa gitnang Silangan at sa pagliit ng suplay ng langis sa merkado na hahantong upang panibagong itaas ng Organization of Petroleum Exporting Countries (OPEC) ang pandaigdigang presyo ng langis.

Ang mga bansang Iran, Iraq at Saudi Arabia ang ilan sa mga malaking prodyuser ng langis sa buong daigdig. Ang nangyayaring pag-igting ng sigalot sa pagitan ng Iran at USA ay lalong magbibigay daan para sumirit ang presyo ng langis sa pandaigdigang merkado at guguluhin ang takbo ng kalakaran sa pandaigdigang saklaw. Tiyak na maaapektuhan nang higit ang mamamayan sa mga atrasadong bansa.
Samantala ang ginawa ng imperyalismong Amerikano ay magdudulot din ng panganib at problema sa buhay at trabaho sa mga kapatid nating overseas Filipino workers na nasa Iran at Iraq sakaling sumiklab ang gyera sa Gitnang Silangan. Nasa 1,600 ang mga OFW ang mga nagtatrabaho sa bansang Iran at 6,000 naman ang nasa Iraq. Walang naghihintay na trabaho sa kanila sa Pilipinas sakaling pwersahan silang palikasin ng gubyernong Duterte kapag sumiklab ang digmaan sa Gitnang Silangan.

Patuloy ang ginagawang pagbabanta ni Pangulong Trump na mayroon pa silang target na 52 na lugar sa Iran na pwede nilang atakehin kabilang ang ilang heritage and cultural places ng bansa. Pinapakita lamang nito ang kagustuhan ng USA na lumikha ng tensyon at mang-upat ng giyera sa iba’t ibang panig ng daigdig upang protektahan ang kanyang hegemonikong interes at kumita ang negosyo sa pagbebenta ng malalakas na sandatang pandigma.

Sa harap ng sumasahol na kalagayan, marapat na higit na palakasin at pag-ibayuhin ng sambayanang Pilipino ang pakikibaka at panawagan sa pagbabasura sa Oil Deregulation Law, Train Law at lahat ng mga anti-mamamayang patakaran at programa na pinatutupad ng rehimeng Duterte. Ang mga naturang batas ang sanhi ng lalong paglobo ng mga pangunahing bilihin at mga batayang serbisyo sa bansa na ang mga mahihirap nating kabababayan ang pangunahing tinatamaan at pumapasan.

Ang pagsasabatas ng Oil Deregulation Law, Train Law, Rice Tariffication Law at iba pang anti-mamayang programa ng mga naunang rehimen at ng kasalukuyang rehimeng US-Duterte ay resulta ng pagpapatupad ng reaksyunaryong estado ng mga patakarang neoliberalista na deregulasyon, liberalisasyon at pribatisasyon. Dapat puspusang labanan at igiit ng taumbayan ang pagbabasura sa patakarang neoliberal ng rehimeng US-Duterte at igiit na kumawala sa lahat ng mga kasunduan sa GATT-WTO, mga imposisyon ng IMF-WB at maging sa mga makaisang panig na kasunduan na pinasok ni Duterte pabor sa imperyalistang China.
Dapat ding igiit sa gubyerno na humanap ng panggagalingan ng enerhiya ang bansa na higit na mura, malinis at hindi nakakasira ng kalikasan upang hindi lubusang umasa ang Pilipinas sa importasyon ng langis mula sa ibang bansa.
Nakikiisa ang NDFP-ST sa sambayanang Pilipino at sa mga pinagsasamantalahan at inaaping mamamayan ng daigdig sa pagkundena sa ginawang lantarang agresyon ng USA sa soberenya ng bansang Iraq at sa paglikha ng iba’t ibang tensyon at sigalot sa Gitnang Silangan at sa iba pang panig ng daigdig. Minsan pang pinakita ng USA ang kanyang mukha bilang nangungunang terorista at agresor sa pandaigdigang saklaw. ###

Hinggil sa pagkakatalaga kay Año upang pamunuan ang PNP

Pahayag | Patnubay de Guia
Tagapagsalita, NDF-ST
Enero 2, 2020

Mariing kinokondena ng National Democratic Front of the Philippines-Southern Tagalog (NDFP-ST) ang pagkakatalaga ni Duterte kay Secretary Eduardo Año, kasalukuyang kalihim ng Department of Interior and Local Government (DILG), bilang pinuno ng Philippine National Police (PNP).

Sa pagkakatalaga kay Año bilang bagong pinuno ng Philippine National Police, lalong pinatalas ni Duterte ang pangil nito sa paghahasik ng teror at lagim sa sambayanang Pilipino.

Hinirang si Año ni Duterte sa kalagayang wala diumano siyang napupusuan sa mga nakahanay na matataas na mga opisyal na tatayong pinuno ng PNP kapalit ng maagang nagretirong “ninja cop” na si General Oscar Albayalde noong Nobyembre 2019.

Ginawang dahilan ni Duterte ang kawalan niya ng tiwala sa integridad ng mga nakahanay na matataas na opisyal ng PNP para maipwesto si Año sa katungkulan.
Dapat paghandaan ng taumbayan ang pagharap at paglaban sa lalong pagtindi ng panunupil ng estado sa kanilang mga demokratikong karapatan at kalayaang sibil ngayong itinalaga na ni Duterte na mamuno sa PNP ang isang militarista, mabalasik at masugid na anti-komunista at tanyag sa pagiging pasistang si Secretary Eduardo Año. Si Secretary Año ang isa sa pangunahing may kinalaman sa pagdukot at pagkawala ni Jonas Burgos, isang agrikulturista ng Kilusang Magbubukid sa Pilipinas (KMP) noong Abril 2007 na pinaniniwalaang pinaslang ng grupo nina Año habang tumatayong pinuno ng kinakatakutang Intelligence Service Group ng Philippine Army (ISG-PA). Hanggang sa kasalukuyan ay hindi pa rin natatagpuan ang mga labi ni Jonas Burgos.

Sa tabing ng di umano’y paglilinis at pagpapatupad ng mga kinakailangang reporma sa hanay ng PNP, mas pinili at itinalaga ni Duterte si Secretary Eduardo Año, upang pakawalan ang buong lupit ng terorismo ng estado sa sambayanang Pilipino tulad ng mga operasyong Synchronized Enhanced Managing Operation (SEMPO)/Oplan SAURON sa Negros at mga katulad na operasyon sa Samar at Kabikulan.

Sa pamamagitan ng kontrol sa AFP at PNP, mapapakilos ni Duterte ang mga ito bilang kanyang pribadong “makinarya ng kamatayan” sa mga extra judicial killings at panunupil sa demokratikong karapatan ng mamamayan kabilang ang mga kritiko at pampulitikang oposisyon.

Asahan na magpapatuloy ang walang kasing-lupit na mga pagpatay at pagdanak ng dugo sa pagpapatupad ng pasistang rehimen ng anti-mamamayan at anti-demokratikong panunupil sa mamamayan sa tabing ng pekeng kampanya laban sa iligal na droga. Makailang beses na sinabi ni Duterte sa kanyang mga pahayag sa publiko na magpapatuloy nang walang humpay, madugo at katatakutan ang kanyang kampanya laban sa iligal na droga.

Sa ilalim naman ng pamumuno ni Año, asahan din ang higit na paglobo ng bilang ng mga biktima ng pang-aabuso at paglabag sa karapatang pantao, korapsyon at pamamayagpag ng mga sindikatong kriminal sa loob ng PNP. Titindi ang mga pag-atake sa masang magsasaka, mga manggagawa, maralitang tagalunsod at sa mga progresibong grupo at organisasyon katulad sa nangyari sa ilang bayan sa Negros Oriental na sabayang pinagpapatay ang pitong mga walang kalaban-laban na mga magsasaka at drayber ng habal-habal at ng iligal na mga pag-aresto sa mga inosenteng sibilyan sa pamamagitan ng SEMPO o mas kilala sa tawag na Oplan Sauron ng PNP. Hindi malayong maulit ang ganitong pangyayari ngayong si Año na ang may tuwirang hawak sa poder ng PNP.

Asahan din ang lalong pagdami ng bilang ng mga kakasuhan at ipakukulong batay sa mga gawa-gawang kaso at pagtatanim ng mga ebidensya ng PNP laban sa mga indibidwal na kasapi ng mga progresibong organisasyon, mga kritiko at oposisyon na masugid na tumutuligsa at lumalaban sa pasista at tiranikong paghahari ni Duterte. Nagawa nang maipwesto ang mga galamay ng PNP sa hudikadura na instrumento sa paglalabas ng search warrants para halughugin at taniman ng ebidensya ang bahay ng mga kilalang lider at aktibista pati mga opisina ng mga progresibong organisasyon.

Walang ibang dapat gawin ang taumbayan kundi ang ihanda ang sarili, higit na palakasin ang hanay at matatag na labanan ang inaasahang matitinding pag-atake sa bayan ng pasista at mersenaryong PNP ngayong si Año na ang may tuwirang kontrol dito. Hindi dapat tayo matakot at masindak sa anumang ihahasik na teror ng administrasyong Duterte. Kailangan ang patuloy at ibayong pagsisikap na pukawin, organisahin at pakilusin ang pinakamalawak na bilang ng mamamayang lalaban at bibigo sa karahasan ng estado.
Ang patuloy na pagsidhi ng kahirapan ng sambayanang Pilipino at ang matinding panunupil ng pasistang rehimeng US-Duterte sa kanilang mga demokratikong karapatan at kalayaang sibil ang magsisilbing matabang lupa para pagsibulan ng disgusto, pagkamuhi at paglaban mula sa mga di-mulat at nahuhuling seksyon ng mamamayang Pilipino at magtutulak sa kanila na sumama at mapabilang sa mga grupo at organisasyong lumalaban sa pasistang rehimen.

Kayang gawin ng taumbayan ang pagpapabagsak sa kapangyarihan ng pasistang rehimeng US-Duterte tulad ng nangyari sa diktador at tiranikong si Ferdinand E. Marcos na pinabagsak ng popular na pag-aalsa sa EDSA. Walang magagawa ang AFP at PNP na hadlangan ang daluyong ng rumagaragasang mga tao sa kalsada na nananawagan ng pagpapatalsik sa kapangyarihan ng isang traydor, korap, kriminal at mamamatay tao na si Duterte.

Samantala, ang rebolusyonaryong kilusan sa Timog Katagalugan (TK) ay patuloy na gagawa ng mga hakbang para singilin at papanagutin ang mga pasista at mersenaryong tropa ni Duterte na patuloy na gumagawa ng krimen laban sa bayan. Titiyakin ng NPA sa rehiyon, sa pamamagitan ng mga ilulunsad nitong mga taktikal na opensiba, na patamaan sa maraming bahagi ang mga isinasagawang focused military operations (FMO) ng AFP at PNP at ng armadong komponente ng Retooled Community Support Program (RCSP) na isinasagawa ng DILG sa balangkas ng whole-of-nation approach to end local communist armed conflict. Uuwi ang mga berdugo at palalong kaaway sa kanilang mga kampo na duguan at bitbit ang kanilang mga kaswalti sa labanan.

Patuloy na hahanapin upang mapanagot at magawaran ng angkop na kaparusahan ang sinumang indibidwal mula sa hanay ng AFP, PNP, CAFGU at iba pang pwersang para-militar ng estado na nakagawa ng krimen laban sa bayan at rebolusyonaryong kilusan. Makakaasa din ang taumbayan sa patuloy at walang humpay na pagsisikap ng rebolusyonaryong kilusan sa TK sa pagtataguyod at pagtatanggol sa interes at kapakanan ng mga mamamayan ng rehiyon. ###

Walang sikreto ang hindi mabubunyag. Walang baho ang hindi aalingasaw. Walang kasinungalingan ang hindi malalantad.

Pahayag | Patnubay de Guia
Tagapagsalita, NDF ST
Disyembre 28, 2019

Lalong nalantad at napatunayan ang matagal nang sinasabi ng rebolusyonaryong kilusan sa rehiyong Timog Katagalugan hinggil sa mga kasinungalingan at mga itinatagong ‘kalansay’ ng Armed Forces of the Philippines (AFP) sa pagkakalat ng mga pekeng balita, pekeng labanan at pekeng mga sumukong NPA. Hindi na kagulat-gulat sa taumbayan ang nalantad na peke at minanipulang litrato ng mga di umano’y sumukong mga NPA sa Masbate. Bihasa ang AFP at PNP sa paglikha ng ganitong mga gawi at eksena para makapaghasik ng kasinungalingan sa taumbayan.

Hindi na bago ang ganitong mga eksena sa nabukong peke at minanipula at niretokeng larawan ng di umano’y mga sumukong NPA sa Masbate dahil ang paglalabas ng mga pekeng surenderees at mga niresiklong nagsisukong mga diumano’y aktibong NPA at taga suporta ng NPA ay bahagi na ng kultura ng AFP at PNP para pagkakwartahan ang mga pondong nakalaan sa kanilang kontra-insurehensyang digma laban sa CPP-NPA-NDFP tulad ng E-CLIP, PAMANA at Balik Loob na mga programa. Kinakailangan din ng mga matataas na opisyal ng AFP at PNP ang ganitong mga pinekeng palabas at achievements upang makakuha ng komendasyon at merito para sa kanilang promosyon sa mas mataas na katungkulan at pusisyon.

Wala na talagang pag-asang makabangon pa sa lugmok sa kalagayan ang imaheng pasista at mersenaryo ng AFP at PNP. Wala nang maniniwala sa kanila kahit anupamang pakiusap ang gawin nila sa publiko na isang pagkakamali lamang at hindi sinasadya ang nangyaring paglalabas, ng isang yunit ng AFP sa Masbate, ng minanipulang larawan ng mga diumanong sumukong NPA.

Matagal nang nakagawian sa loob ng AFP at PNP ang pagmamanipula at pagbabaluktot ng mga datos, impormasyon at pangyayari para palabasing nagtatagumpay ang kanilang kontra-rebolusyonaryong digma. Malalim na ang pagkabatid ng publiko sa modus at tiwaling gawi ng mga matataas na opisyal ng AFP at PNP na pagkakitaan at ibulsa ang mga pondong nakalaan sa kanilang programang kontra-insurehensya.
Pinatunayan lang ng nalantad na pangyayari sa Masbate na totoo at walang bahid ng pagdududa ang mga pahayag ng rebolusyonaryong kilusan sa rehiyong Timog Katagalugan na pawang mga kasinungalingan, niresiklo at palabas na zarzuela ang pahatid balita ng AFP at PNP hinggil sa diumano’y mga sumukong NPA sa rehiyon. Sa malaot madali malalantad din ang katotohanan sa likod ng sapilitang pagpapataw ng rehimeng Duterte sa mga LGU’s na ideklara ang CPP-NPA-NDFP bilang persona-non-grata.

Ang buhay na na karanasan ng taumbayan sa talamak na kasinungalingan at kalupitan ng AFP at PNP ang nagbubunsod upang lalong dumami ang naghihimagsik laban sa pasistang rehimeng US-Duterte. Araw araw na lang napapabalita ang iba’t ibang anyo ng katiwalian, karahasan at kalupitan ng AFP at PNP at dahil dito wala ding humpay ang pagbatikos at paglaban na tinatamasa nila sa mula taumbayan.

Lalo lamang pinag-aapoy ang dati nang nag-aalab na damdamin ng taumbayan na wakasan na ang mga pagsasamantala at pang-aapi sa bansa sa pamamagitan ng armadong rebolusyon at pabagsakin ang nabubulok sa kaibuturan na malapyudal at malakolonyal na sistema ng lipunang Pilipino.

Tama ang naging pag-amin ng Department of Interior and Local Goverment (DILG) at National Intelligence Coordinating Agency (NICA) na bigo ang kanilang propaganda war laban sa CPP-NPA-NDFP subalit mali ang kanilang tinutuntungang dahilan. Hindi lang dahil sa magagaling at episyente ang mga propagandista ng rebolusyonaryong kilusan kung bakit nakalalalamang ito sa pasistang rehimeng Duterte sa usapin ng propaganda.

Armado ng katotohanan at nakabatay sa mga tunay na datos at aktwal na pangyayari ang mga pinapahayag ng mga tagapagsalita at personalidad ng rebolusyonaryong kilusan at hindi tulad sa mga kasinungalingan, pambabaluktot, manipulasyon at mga “itim” na propaganda na inihahasik ng pasistang rehimeng US-Duterte. Ang katotohanan ay hindi kayang pagtakpan ng pag-uulit-ulit ng mga kasinungalingan. Walang sikreto ang hindi mabubunyag. Walang baho ang hindi aalingasaw. Walang kasinungalingan ang hindi malalantad. ###

Ipagdiwang ang ika-51 anibersaryo ng Partido Komunista ng Pilipinas!

Pahayag | Patnubay de Guia
Tagapagsalita, NDF ST
Disyembre 28, 2019

Malugod na nakikiisa ang NDFP-ST sa ginanap na selebrasyon ng mga komite ng Partido at yunit ng hukbong bayan sa ika-51 Anibersaryo ng Communist Party of the Philippines (CPP) sa mga teatro at larangang gerilya.

Sinimulan ang mga selebrasyon sa pag-awit ng Internasyunal at pagbigay-pugay sa bandila ng Communist Party of the Philippines ng mga kasapi ng Partido at New People’s Army kasama ang rebolusyonaryong mamamayan sa kanayunan at mga nakipagdiwang na mga rebolusyonaryo mula kalunsuran.
Hindi napigilan ang mga pagdiriwang sa ika-51 anibersaryo ng CPP ng mga operasyong kombat ng AFP tulad ng naiulat sa Palawan at Bondoc Peninsula na may layuning sabotahehin ang ginagawang preparasyon ng mga yunit ng hukbo at rebolusyonaryong mamamayan. Hindi rin nakapigilan ang baseng masa sa kanayunan na lumahok sa pagdiriwang ng Partido kahit sa mga lugar na matinding tinamaan at pininsala ng bagyong Ursula.

Patunay ito ng nagpapatuloy na tinatamasang malawak at malalim na suporta sa CPP-NPA-NDFP mula sa masa ng rehiyong Timog Katagalugan. Testamento ito na ang CPP at NPA ay malalim na nakaugat sa malawak na masang api’t pinagsasamantalahan. Hindi mapasusubalian ang suportang ito gaano man ang gawing pagbaluktot ng mga eksperto sa say-ops ng AFP. Walang bisa ang kahit na anong mga palabas ng pagdideklara sa CPP-NPA-NDFP na persona non grata ng reaksyunaryong gubyerno at gaano man karami ang iparada nilang mga pinekeng sukong NPA.

Libong mamamayan ang dumalo at nakiisa sa pagdiriwang ng ika-51 anibersaryo ng pagkatatag ng Communist Party of the Philippines (CPP) na ginanap sa iba’t ibang sona at larangang gerilya sa rehiyon ng Timog Katagalugan. Daan-daang katao ang nagtipun-tipon mula sa magkakanugnog na mga barangay sa saklaw ng mga sona’t larangang gerilya sa rehiyon upang saksihan at makipagdiwang sa taunang selebrasyon ng pagkakatatag ng CPP.

Hindi alintana ang hirap at pagod mula sa malalayong paglalakad makarating lamang sa lugar na pagdarausan ng pagdiriwang. Hindi rin naging malaking hadlang sa iba ang pinsalang dinulot ng bagyong Ursula para hindi makadalo sa pinakaaabangan at kinasasabikan nilang taunang pagdiriwang ng pinakamamahal nilang Partido. Higit sanang mas malaki ang nakadalo sa mga naturang pagtitipon kung hindi tumama ang bagyong Ursula. Naroon man ang kanilang kagustuhan na lahat ng kapamilya ay makadalo sa selebrasyon, kailangan pa ring may mag-asikaso sa mga iniwang pinsala sa kanilang kabuhayan ng bagyong Ursula.

Marami din mula sa kalunsuran at mga sentrong bayan ng rehiyon ang nakiisa at dumalo sa pagdiriwang na idinaos sa kanayunan ng rehiyon. Habang ang ibang hindi nakasama sa pagpunta sa kanayunan ay nagtipon tipon din sa mga baseng komunidad sa urban at sentrong bayan upang sikretong idaos ang pagdiriwang ng ika-51 na anibersaryo ng Partido.

Di inalintana ang hirap at pagod na dinanas ng mga kasama mula sa kalunsuran ang malayong lakarin at maputik na daan patungo sa mga pagdarausan ng pagdiriwang. Taglay ang mataas na entusiyasmo, hangad nilang makilahok sa makasaysayang araw ng pagkakatatag ng Partido kapiling ang masa at hukbong bayan. Masaya at mainit silang sinalubong ng masa at ng mga opisyal at mandirigma ng New People’s Army sa lugar.

Hinandugan sila ng mga awiting tanda ng mainit at mapagkasamang pagsalubong at pagtanggap sa kanilang pagdating.
Ang ilan sa dumalo at nakiisa sa pagdiriwang ay nagpaiwan at nagpasyang sumampa bilang mga bagong mandirigma ng New People’s Army. Kabilang sila sa maramihang nagsisisampahan bilang pagtugon sa panawagan ng Partido. Malaking tagumpay ang maramihang pagsapi sa Bagong Hukbong Bayan sa panahon ng pagdiriwang ng ika-51 Anibersaryo ng CPP.

Ang pagdagsa ng tao sa selebrasyon ng anibersaryo ng Partido ay pagpapakita kung gaano kamahal ng mamamayan ng rehiyon ang CPP. Para sa masa, napakahalaga na makadalo sa taunang pagdiriwang ng anibersaryo ng Partido. Sinikap nilang kahit isa man lamang sa kanilang pamilya ang makadalo upang sa pagbalik ay mayroong maibabahaging kwento sa naging kaganapan sa pinakahihintay nilang pagdiriwang ng anibersaryo.

Patunay lamang ito kung gaano kalawak at kalalim ang naging ugat ng Partido sa hanay ng masang anakpawis upang patuloy na dagsain ang pagdiriwang ng anibersaryo ng pagkakatatag nito. May kalamidad mang dumaan pilit pa ring dadalo para saksihan ang pagdiriwang ng dakilang araw ng kaarawan ng pinakamamahal nilang Partido.

Ang maramihang pagdalo ng mga mamamayan sa pagdiriwang ng anibersaryo ng Partido sa iba’t ibang panig ng TK ay nagtatatwa at pinabubulaanan ang mga pahayag ng pasistang rehimeng US-Duterte na walang dapat ipagdiwang ang CPP dahil sa nawawalan na ito ng suporta mula sa taumbayan. Pero kung pumayag lamang sana ang tagapagsalita ni Duterte na si Secretary Salvador Panelo sa imbitasyon ng Melito Glor Command na pumunta sa isang larangang gerilya sa rehiyon, siguradong personal niyang malalaman at masasaksihan kung gaano kalalim at kalawak ang tinatamasang suporta ng rebolusyonaryong kilusan mula sa mamamayan ng TK.

Dangan lamang ang problema ni Secretary Panelo ay hindi marunong kumilatis ng katotohanan kundi mas bihasa siyang baluktutin at maglubid ng kasinungalingan. Pinuhunanan at naging hanapbuhay na niya sa administrasyong Duterte ang panlilinlang at paghahasik ng kasinungalingan sa taumbayan.

Tampok sa pagdiriwang ang pag-awit ng mga rebolusyonaryong awitin, ang marching drill ng NPA, ang iba’t ibang kulturang pagtatanghal mula sa masa, kasama, mga kaibigan at iba pang mga naging bisita. Ang pinakatampok sa aktibidad ay ang pagbasa ng pahayag ng Komiteng Rehiyon sa ika-51 anibersaryo ng CPP kung saan muling binigyan ng pinakamataas na pagkilala at parangal ang mga martir at bayani ng rebolusyon, binaybay ang mga naging kakulangan at tagumpay ng Partido sa rehiyong TK sa nakaraang taon at itinakda ang mga tungkulin para sa susunod na mga taon.

Lubos ang pag-asa ng Komite ng Partido sa TK na higit na magiging masaya at makabuluhan ang pagdiriwang ng ika-52 na anibersaryo ng Partido sa taong 2020. Buo ang kapasyahan ng Partido, hukbong bayan at rebolusyonaryong mamamayan na biguin ang EO 70, whole-of-nation approach at JCP Kapanatagan. Mataas ang kumpyansa nitong dalhin sa isang bago at mas mataas na antas ang digmang bayan sa darating na mga taon. ###

On the Reciprocal and Unilateral Ceasefire between GRP and NDFP

Pahayag | Patnubay de Guia
Tagapagsalita, NDF ST
December 24, 2019

Ang National Democratic Front of the Philippines-Southern Tagalog ay lubos na nakikiisa at sumusuporta sa magkatugong pagdedeklara ng tigil putukan sa pagitan ng Communist Party of the Philippines – New People’s Army (CPP/NPA) at ng Government of the Republic of the Philippines (GRP).

Ang pagdedeklara ng Komite Sentral ng CPP ng tigil putukan ay alinsunod sa rekomendasyon ng Negotiating Panel ng National Democratic Front of the Philippines na magpatupad ng reciprocal and unilateral ceasefire (RUCF) upang lumikha ng magandang klima paborable sa pagdaraos ng mga impormal na pag-uusap at bilang paghahanda sa pagdaraos ng pormal na pulong sa pagpapatuloy ng negosasyong pangkapayapaan.

Iniutos ng sentral na pamunuan ng CPP sa lahat ng mga komand at yunit ng NPA at ng mga yunit ng milisyang bayan na ipatupad ang atas ng tigil putukan sa buong bansa mula 00:00H 23 ng Disyembre 2019 hanggang 23:59H ng 7 Enero 2020.

Kaalinsabay nito, naglinaw din ang CPP na magkakabisa lamang ang sariling unilateral ceasefire sa oras na maglabas ng katugong utos ng tigil putukan ang GRP sa anyo ng Suspension of Military Operations (SOMO) ng AFP at Suspension of Police Operations (SOPO) ng PNP.

Inilabas ng CPP ang kanyang kautusan nuong Disyembre 22, 2019 ng umaga at noong gabi naman ang kautusan ni Duterte. Umaga naman ng Disyembre 23, 2019 ibinalita na naglabas ng magkasunod na order ng SOMO ang AFP at SOPO ng PNP subalit walang nailalathala ng mismong kautusan sa mayor na mga dyaryo at website ng AFP at PNP bilang pruweba sa pagtalima ng mga ito sa kautusan ni Duterte.

Bilang pagpapakita ng sinseridad at pagtugon sa kautusan ng sentral na pamunuan ng CPP, ang pamunuan ng CPP sa rehiyon ng Timog Katagalugan sa pamamagitan ng Melitor Glor Command ng NPA sa rehiyon ay naglabas ng atas sa lahat ng mga komand at yunit ng NPA na istriktong ipatupad ang kautusan ng tigil putukan. Sa panahon ng tigil putukan, ang lahat ng mga komand at yunit ng NPA at milisyang bayan ay dapat ihinto at isuspinde ang mga opensibang militar laban sa mga armadong yunit at tauhan ng AFP at PNP at iba pang grupong paramilitar na nakapailalim sa AFP.

Samantala, ipapatupad ang depensibang moda kapwa sa taktikal at estratehikong lebel. Panatilihin sa anumang panahon ang mataas na alerto at militansya laban sa patraydor na pag-atake ng kaaway at iba pang pagkilos na labag sa kasunduan ng tigil putukan. Tinagubilinan na magpapatupad lamang ng aktibong depensya kapag nahaharap sa malinaw at napipintong panganib at sa aktwal na armadong pag-atake ng mga kalabang pwersa.

Sa nasabing atas ng CPP, tinagubilinan din ang lahat ng mga sangay at komite ng Partido, mga yunit ng NPA, milisyang bayan at maging mga rebolusyonaryong organisasyong masa na mahigpit na i-monitor ang mga galaw at aksyon ng mga armadong yunit at tauhan ng GRP na taliwas at labag sa kasunduang reciprocal and unilateral ceasefire. Ang mga impormasyon na makakalap ay dapat i-ulat sa mga kinaukulang mga komand ng NPA at liderato ng Partido.

Sa harap ito ng mga pumapasok na mga nakababahalang ulat mula sa mga kumander at yunit ng NPA na nagpapatuloy ang mga focused military operations ng AFP at PNP sa mga larangang gerilya sa kabila ng kanilang kautusang SOMO at SOPO—isang malinaw na paglabag sa RUCF.

Sa Palawan, naglulunsad ng operasyong militar ang dalawang kolum ng 18th Special Forces Company ng Philippine Army sa ilalim ng SOCOM sa So. Bayabas, Brgy. Quenlugan, Quezon simula pa kahapon, Disyembre 23. Nagpapatuloy din ang isinasagawang operasyong militar ng laking platung pwersa ng 85th IBPA sa Brgy. Villa Nacaub at ng isang iskwad nito sa Brgy. San Francisco B, kapwa sa Lopez, Quezon.

Patuloy na inaalam pa sa ibang mga larangang gerilya ng NPA ang katulad na mga probokasyong militar ng AFP at PNP.
Pinabubulaanan nito ang mga malisyosong pag-iingay at pagkakalat ng mga balita at kasinungalingan ng mga mananabotahe at peace spoilers upang hadlangan ang posibilidad na muling maipagpatuloy ang usapang pangkapayapaan sa pagitan ng GRP at NDFP. ###

Hinggil sa Sinseridad ng NDFP sa Usapang Pangkapayapaan sa GRP

Pahayag | Patnubay de Guia
Tagapagsalita, NDF ST
Disyembre 17, 2019

Ituloy ang usapang pangkapayapaan sa pagitan ng NDFP at GRP nang walang pinapataw na kundisyon at dapat nakabatay sa mga naunang kasunduan.

Mariing pinabubulaanan at kinukundena ng National Democratic Front of the Philippines-Southern Tagalog (NDFP-ST) ang malisyoso, makasarili at punong puno ng kasinungalingan na paratang nina Secretary Panelo, Secretary Año ng Department of Interior and Local Government (DILG) at maging ng mga tagapagsalita ng AFP at PNP na hindi sinsero ang National Democratic Front of the Philippines (NDFP) sa pagpapatuloy ng usapang pangkapayapaan dahil sa mga pag-atake ng NPA sa mga pasistang tropa ng reaksyunaryong gubyerno.

Gustong linlangin nina Panelo ang publiko na kahit walang pinaiiral na tigil putukan ang CPP-NPA-NDFP ay dapat nitong itigil ang mga pagsalakay at talian ang sariling kamay para atakehin ng mga pasistang tropa. Pinararatangan nitong hindi sinsero ang NDFP sa usapang pangkapayapaan sa pagitan ng GRP upang pagtakpan ang katotohanan ng ginagawang walang-tigil na operasyong kombat ng AFP-PNP laban sa CPP-NPA-NDFP at rebolusyonaryong mamamayan. Nais nina Panelo na ipatigil ang mga pag-atake ng NPA upang maipakita diumano ang sinseridad ng NDFP sa usapang pangkapayapaan habang walang tigil naman itong inaatake ng AFP at PNP.
Subalit ang talagang gustong mangyari nina Panelo, Año, AFP at PNP ay gawing pipitsuging target ng AFP at PNP ang NPA at maging inutil at walang kalaban-laban na ipagtanggol ang sarili at mamamayan sa harap ng patuloy at walang puknat na paglulunsad nito ng focused military operation (FMO) alinsunod sa kanilang whole of nation approach (WNA) at Joint Campaign Plan-Kapanatagan (JCP-Kapanatagan).

Nilalayon ni Duterte na tapusin ang armadong tunggalian sa bansa sa pagtatapos ng termino ng pasistang rehimeng US-Duterte sa 2022. Ang sukatan nina Panelo sa sinseridad ng NDFP sa usapang pangkapayapaan ay kung magsasawalang kibo ang CPP-NPA-NDFP at magiging pasibo sa harap ng mga pag-atake ng pasistang tropa laban sa rebolusyonaryong kilusan tulad ng ginawa nilang masaker kina Kasamang Ermin Bellen, Jose Villahermosa at Lucio Simburoto noong Disyembre 5, 2019 sa Barangay Cupang, Antipolo City, pagdakip kay Jaime Padilla na konsultant ng NDFP at ang pinakahuling pangyayari sa Matnog, Sorsogon kung saan napabalitang 4 na kasama ang napaslang.

Ang katotohanan, hindi pa man nagkakausap sina Secretary Bello at mga kinatawan ng NDFP na nakabase sa The Netherlands sa posibilidad na muling ipagpatuloy ang usapang pangkapayapaan ay kabi-kabilaan na ang ginawang pagputak at pagtutol ng mga pasista at militaristang elemento sa gabinete ni Duterte na bantog na mga mananabotahe at peace spoilers sa usapang pangkapayapaan. Sila ang dapat kastiguhin ni Duterte kung tunay nga siyang sinsero na muling makipag-usap sa NDFP para sa kapayapaan.

Ang sinseridad ng National Democratic Front of the Philippines (NDFP) ay makikita sa kagustuhan nitong lutasin ang ugat at sanhi ng armadong tunggalian sa bansa at dalhin ang pag-uusap sa pagkakamit ng makatarungan at pangmatagalang kapayapaan sa Pilipinas. Dahil dito, seryoso ang NDFP sa pagtataguyod at pagtupad sa mga naunang kasunduan na pinirmahan ng magkabilang panig tulad ng The Hague Joint Declaration, ang Joint Agreement on Safety and Immunity Guarantee (JASIG) at ang unang substansyal na agenda ng usapang pangkapayapaan na napagkasunduan ng dalawang panig – ang Comprehensive Agreement on the Respect of Human Rights and International Humanitarian Law (CARHRIHL) noong 1998.

Sa ganito, wala ni anumang bahid para pagdudahan ang kaseryosohan ng NDFP na pumasok sa usapang pangkapayapaan sa GRP kahit noon pa mang administrasyon ni. Corazon Aquino at hanggang sa kasalukuyang rehimeng Duterte kahit paulit-ulit na sinasabotahe ito ng GRP.
Ang Comprehensive Agreement on Socio-Economic Reforms (CASER) ng NDFP ay seryosong programa sa pagpapatupad ng tunay na reporma sa lupa at sa gagawing pagpapaunlad ng kanayunan. Katuwang ng pagpapatupad ng tunay na reporma sa lupa ang pambansang industralisasyon at pagpapaunlad ng buong ekonomiya ng bansa. Ang pagkakaroon ng tunay na reporma sa lupa at pambansang industriyalisasyon ay seryosong hakbang ng NDFP para lutasin ang dahilan ng armadong tunggalian sa bansa at magbigay daan para sa pagkakamit ng makatarungan at pangmatagalang kapayapaan.

Kung tutuusin, ang GRP ang pangunahing may kagagawan at pinagsisimulan kung bakit nagkakaroon ng mga pagkaantala sa usapang pangkapayapaan. Sila ang unilateral na nagdedeklara ng mga breakdown sa pag-uusap, ng mga suspensyon at terminasyon ng usapang pangkapayapaan kapag hindi nila napapanikluhod at napapasunod ang NDFP sa kanilang mga maitim na pakana at kagustuhan.

Malaking balakid sa pag-uusap ang patuloy na pagtatakda ng GRP ng mga kundisyon tulad ng pagdedeklara muna ng tigil-putukan bago ang pag-uusap, na sa Pilipinas gawing ang pag-uusap at hindi sa nyutral na lugar at sa paggigiit sa linya ng kapitulasyon para pasukuin ang NDFP.

Sa karanasan, hindi mapagkakatiwalaan ang rehimeng Duterte na igalang ang mga pinirmahang kasunduan na madali lamang nitong isantabi kapag hindi pabor sa GRP. Paulit-ulit na nilalabag ng GRP ang mga pinagkaisahang pangkalahatang prinsipyo at balangkas ng usapang pangkapayapaan at mga kasunduan na nauna nang pinagtibay at pinirmahan ng dalawang panig. Patuloy ang pag-aresto sa mga NDFP consultants at istap na imbwelto sa usapang pangkapayapaan kahit protektado sila ng kasunduan sa JASIG. Ikinulong sila batay sa mga gawa-gawang kasong kriminal para hindi makapag piyansa at mabinbin nang matagal sa kulungan habang dinidinig ang mga isinampang gawa-gawang kaso.
Paulit-ulit na iginigiit ng GRP na idaos sa bansa ang pag-uusap na malinaw na paglabag sa kasunduan sa The Hague Joint Declaration na nakasaad na ang pag-uusap ay dapat isagawa sa isang foreign and neutral venue.

Nasa gubyernong Duterte ngayon ang bola upang patunayan kung sinsero ang kanyang gubyerno na muling ipagpatuloy ang usapang pangkapayaan sa NDFP. Ang unang dapat niyang gawin ay ipatupad ang mga sumusunod:

Pagbawi sa Proclamation No. 360 na opisyal na nagdedeklara na terminado na ang usapang pangkapayapaan ng GRP sa NDFP na kanyang inilabas noong Nobyembre 23, 2017;

Pagbawi sa Proclamation 374 noong Disyembre 5, 2017 na nagdedeklarang mga “terorista” ang mga rebolusyonaryong organisasyon ng CPP-NPA at NDFP.
Pagbasura sa Executive Order No. 70 na nagbubuo ng national task force to end local communist armed conflict sa pamamagitan ng whole of nation approach na inilabas niya nuong Disyembre 4, 2018; at

Bilang huli, pag-atras sa proscription sa CPP-NPA bilang mga teroristang organisasyon alinsunod sa RA 9372 o Human Security Act of 2007 na nakasampa sa mababang korte.

Sa mga nasa itaas susukatin ang sinseridad ng rehimeng Duterte at ng GRP sa pagpapatuloy ng usapang pangkapayapaan. ###

CPP 46th Anniversary Celebration

Pagdiriwang ng ika-46 anibersaryo ng Partido Komunista ng Pilipinas sa probinsya ng Quezon

Bidyo panayam kay Ka Eduardo Labrador

Bidyo panayam kay Kasamang Eduardo Labrador
Tagapagsalita ng Pambansang Katipunan ng mga Magbubukid-Timog Katagalugan